କୃତ୍ରିମ ବୁଦ୍ଧିମତାର ଦାୟିତ୍ୱପୂର୍ଣ୍ଣ ବ୍ୟବହାରରେ ଜନସମ୍ପର୍କର ଭୂମିକା ଉପରେ ଆଲୋଚନା ଭୁବନେଶ୍ୱର: ପବ୍ଲିକ ରିଲେସନ୍ସ ସୋସାଇଟି ଅଫ ଇଣ୍ଡିଆ (ପିଆରଏସଆଇ) ଭୁବନେଶ୍ୱର ଚାପ୍ଟର ପକ୍ଷରୁ ଆଇଆଇଟି ଭୁବନେଶ୍ୱର ସହିତ ମିଳିତ ସହଯୋଗରେ, ସୋମବାର ଆଇଆଇଟି ଭୁବନେଶ୍ୱର ପରିସରରେ 'କୃତ୍ରିମ ବୁଦ୍ଧିମତାର ଦାୟିତ୍ୱପୂର୍ଣ୍ଣ ବ୍ୟବହାର: ଜନସମ୍ପର୍କ କ୍ଷେତ୍ରର ଭୂମିକା' ବିଷୟବସ୍ତୁ ଉପରେ ବିଶିଷ୍ଟ ବକ୍ତାମାନଙ୍କ ଦ୍ୱାରା ଆଲୋଚନାଚକ୍ର ସହିତ ଜାତୀୟ ଜନ ସମ୍ପର୍କ ଦିବସ ୨୦୨୫ ପାଳନ କରାଯାଇଛି। ଏହି ଅବସରରେ, ଆଇଆଇଟି ଭୁବନେଶ୍ୱରର ନିର୍ଦ୍ଦେଶକ ପ୍ରଫେସର ଶ୍ରୀପଦ କରମାଲକର କହିଛନ୍ତି: "ପ୍ରଯୁକ୍ତିବିଦ୍ୟା, ବିଶେଷକରି ଏଆଇ, ଏହାର ବ୍ୟବହାର ପଛରେ ଥିବା ଉଦ୍ଦେଶ୍ୟ ପରି ନୈତିକ ଏବଂ ପ୍ରଭାବଶାଳୀ। ଯୋଗାଯୋଗର ସଂରକ୍ଷକ ଭାବରେ, ଜନସମ୍ପର୍କ ଵୃତ୍ତୀଧାରୀମାନେ ଏକ ଗୁରୁ ଦାୟିତ୍ୱ ବହନ କରନ୍ତି - କେବଳ ସୂଚନା ଦେବା ପାଇଁ ନୁହେଁ, ବରଂ ନୈତିକ ଉପାୟରେ ପ୍ରଭାବିତ କରିବା ପାଇଁ। ତିନୋଟି ସ୍ତମ୍ଭ - ଯୋଗାଯୋଗ, ସହଯୋଗ ଏବଂ ଗଠନମୂଳକ ଚିନ୍ତାଧାରା - କେବଳ ଶିକ୍ଷାଗତ ଆଦର୍ଶ ନୁହେଁ, ବରଂ ଜନସମ୍ପର୍କ କ୍ଷେତ୍ରରେ ଏଆଇକୁ ଦାୟିତ୍ୱର ସହିତ ଏବଂ ମହତ ଉଦ୍ଦେଶ୍ୟ ସହିତ ବ୍ୟବହାର କରାଯିବା ସୁନିଶ୍ଚିତ କରିବାରେ ଅତ୍ୟାବଶ୍ୟକୀୟ ଉପକରଣ।" ସେ ଏଆଇ ନବସୃଜନକୁ ସଚ୍ଚୋଟତା ଏବଂ ନୈତିକ ଉପାୟରେ ବ୍ୟବହାର କରିବା ଉପରେ ଗୁରୁତ୍ୱାରୋପ କରିଥିଲେ। କୃତ୍ରିମ ବୁଦ୍ଧିମତାର ଦାୟିତ୍ୱପୂର୍ଣ୍ଣ ବ୍ୟବହାର ଏବଂ ଜନସମ୍ପର୍କର ଭୂମିକା ଉପରେ ବିଶିଷ୍ଟ ବକ୍ତା ଭାବରେ ରିଲାଏନ୍ସ ଜିଓ ଇନଫୋକମ୍ ଲିମିଟେଡର ଉପାଧ୍ୟକ୍ଷ ଏବଂ କର୍ପୋରେଟ୍ ଯୋଗାଯୋଗ ମୁଖ୍ୟ ଶ୍ରୀ ରୋହିତ ଦୁବେ କହିଥିଲେ, "ଜନସଂପର୍କରେ ଏଆଇ ଏକ ବୃଦ୍ଧିକାରକ, ପ୍ରତିବନ୍ଧକ ନୁହେଁ। ଏହା ଏକ ଉତ୍ପାଦକତା ବୃଦ୍ଧିକାରୀ, ଏକ ସୃଜନଶୀଳ ଅଂଶୀଦାର - ଏକ ସହ-ପାଇଲଟ୍, ଏକ ଅଟୋପାଇଲଟ୍ ନୁହେଁ। ଯେଉଁମାନେ ଏଆଇକୁ ଗ୍ରହଣ କରନ୍ତି ସେମାନେ ପାଆନ୍ତି ଯେ ଏହା ସେମାନଙ୍କୁ ଶ୍ରମଗତ କାମରୁ ମୁକ୍ତ କରେ, ସେମାନଙ୍କୁ ଅପ୍ରାସଙ୍ଗିକ କରିବା ପରିବର୍ତ୍ତେ ସେମାନଙ୍କର ମୂଲ୍ୟ ବୃଦ୍ଧି କରେ।" ସେ ଏହାକୁ କମ୍ପ୍ୟୁଟର ବିଜ୍ଞାନ ଛାତ୍ରମାନଙ୍କ ପାଇଁ ଜନସମ୍ପର୍କ ବୃତ୍ତିଧାରୀଙ୍କ ସହିତ ସହଭାଗିତା ଜରିଆରେ ଭାରତ-କେନ୍ଦ୍ରିକ ଜନସମ୍ପର୍କ କୌଶଳଗୁଡ଼ିକ ସହ-ନିର୍ମାଣ କରିବା ପାଇଁ ଏକ ଚମତ୍କାର ସୁଯୋଗ ଭାବରେ ବର୍ଣ୍ଣନା କରିଥିଲେ, ଯେପରିକି - ମିଡିଆ ଆନାଲିଟିକ୍ସ ଏବଂ ରିଅଲ୍-ଟାଇମ୍ ସେଣ୍ଟିମେଣ୍ଟ ଟ୍ରାକିଂ ଠାରୁ ଆବଶ୍ୟକତା ଅନୁଯାୟୀ ବିଷୟବସ୍ତୁ ପ୍ରସ୍ତୁତ କରିବା ଇତ୍ୟାଦି। ଭାରତରେ ଜନସମ୍ପର୍କ ଟେକ୍ କ୍ଷେତ୍ର ତୁଳନାତ୍ମକ ଭାବରେ ଅବ୍ୟବହୃତ ରହିଛି ଏବଂ ଏହି କ୍ଷେତ୍ରରେ ବହୁତ କମ୍ ଘରୋଇ ସଫ୍ଟୱେର୍ ଷ୍ଟାର୍ଟଅପ୍ ଧ୍ୟାନ ଦେଉଥିବା ଉଲ୍ଲେଖ କରି ସେ ଛାତ୍ରଛାତ୍ରୀମାନଙ୍କୁ ଏହାକୁ ଏକ କଲେଜ ପ୍ରକଳ୍ପ କିମ୍ବା ଏକ ଉଦ୍ୟୋଗୀ ଉଦ୍ୟମ ଭାବରେ ନେବାକୁ ଆହ୍ୱାନ ଜଣାଇଥିଲେ। ଏହି ପରିପ୍ରେକ୍ଷୀରେ, ପିଆରଏସଆଇ ଭୁବନେଶ୍ୱର ଚାପ୍ଟରର ଅଧ୍ୟକ୍ଷ ଶ୍ରୀଯୁକ୍ତ ସୁଧି ରଞ୍ଜନ ମିଶ୍ର ଜାତୀୟ ଜନସଂପର୍କ ଦିବସର ଗୁରୁତ୍ୱ ଉପରେ ଆଲୋକପାତ କରି କହିଥିଲେ ଯେ, "ବ୍ୟାପକ ସାମାଜିକ ଗଣମାଧ୍ୟମ ପ୍ରଭାବ ରହିଥିବା ଯୁଗରେ, ଭୁଲ ସୂଚନା ଏବଂ ଭ୍ରମାତ୍ମକ ଖବରର ମୁକାବିଲା କ୍ଷେତ୍ରରେ ଜନସଂପର୍କ ଅଧିକାରୀଙ୍କ ଭୂମିକା ଏବଂ ଦାୟିତ୍ୱ ବର୍ତ୍ତମାନ ବହୁତ ଅଧିକ ହୋଇଛି।" ଆଇଆଇଟି ଭୁବନେଶ୍ୱରରେ ଦାୟିତ୍ୱପୂର୍ଣ୍ଣ ଆର୍ଟିଫିସିଆଲ ଇଣ୍ଟେଲିଜେନ୍ସ ଏବଂ ପଦକ୍ଷେପ ବିଷୟରେ ବକ୍ତବ୍ୟ ରଖି, ଆଇଆଇଟି ଭୁବନେଶ୍ୱରର କମ୍ପ୍ୟୁଟର ସାଇନ୍ସ ଏବଂଇଞ୍ଜିନିୟରିଂ ବିଭାଗର ମୁଖ୍ୟ, ଡକ୍ଟର ଦେବୀ ପ୍ରସାଦ ଡୋଗ୍ରା କହିଥିଲେ, "ଏଆଇ ର ଆଗମନ ସ୍ୱାସ୍ଥ୍ୟସେବା, ସାର୍ବଜନୀନ ସେବା ଏବଂ ଅନ୍ୟାନ୍ୟ କ୍ଷେତ୍ରରେ ବିକାଶକୁ ତ୍ୱରାନ୍ୱିତ କରିଛି। ତଥାପି, ଏଆଇକୁ ଦାୟିତ୍ୱପୂର୍ଣ୍ଣ ଭାବରେ ବ୍ୟବହାର କରିବା ଉପଭୋକ୍ତାଙ୍କ ଉପରେ ନିର୍ଭର କରେ ଏବଂ ଏଆଇ ମଡେଲର ସୃଷ୍ଟିକର୍ତ୍ତାମାନେ ଏଆଇର ମୂଳ ତଥ୍ୟ ପ୍ରକାଶ କରିବାରେ ସତର୍କ ରହିବା ଉଚିତ। ଆଇଆଇଟି ଭୁବନେଶ୍ୱର ଦେଶର ଦ୍ରୁତ ଏବଂ ସୁରକ୍ଷିତ ଅଭିବୃଦ୍ଧି ପାଇଁ ଦାୟିତ୍ୱପୂର୍ଣ୍ଣ ଏବଂ ନୈତିକ ଏଆଇ ସିଷ୍ଟମ ବିକାଶ ଦିଗରେ ବିଭିନ୍ନ ପଦକ୍ଷେପ ଆରମ୍ଭ କରିଛି।" ଆଇଆଇଟି ଭୁବନେଶ୍ୱରର ପିଆରଓ ଶ୍ରୀମତୀ ଧରିତ୍ରୀ ଶତପଥୀ ଜନସମ୍ପର୍କ କ୍ଷେତ୍ରରେ କୃତ୍ରିମ ବୁଦ୍ଧିମତ୍ତା ଉପରେ ତଥ୍ୟ ଉପସ୍ଥାପନା କରିଥିଲେ, ଯେଉଁଥିରେ ଜନସମ୍ପର୍କ କ୍ଷେତ୍ରରେ କୃତ୍ରିମ ବୁଦ୍ଧିମତାର ଆହ୍ୱାନ ଏବଂ ନୈତିକ ବିଚାର ଉପରେ ଆଲୋକପାତ କରାଯାଇଥିଲା। ପିଆରଏସଆଇ ଭୁବନେଶ୍ୱର ଚାପ୍ଟର ସଚିବ କୃଷ୍ଣଚନ୍ଦ୍ର ମହାପାତ୍ର ଧନ୍ୟବାଦ ପ୍ରସ୍ତାବ ଉପସ୍ଥାପନ କରିଥିଲେ। ଏହି ପରିପ୍ରେକ୍ଷୀରେ ପିଆରଏସଆଇ ଭୁବନେଶ୍ୱର ଚାପ୍ଟରର ୱେବସାଇଟ୍ www.prsibhubaneswar.in ର ଆନୁଷ୍ଠାନିକ ଉନ୍ମୋଚନ ମଧ୍ୟ ହୋଇଥିଲା। ଜାତୀୟ ଜନସଂପର୍କ ଦିବସ ୨୦୨୫ ପାଳନ ଅବସରରେ ଜନସମ୍ପର୍କ ଏବଂ କର୍ପୋରେଟ୍ ଯୋଗାଯୋଗ ବୃତ୍ତିଧାରୀ, ପିଆରଏସଆଇ ଭୁବନେଶ୍ୱର ଚାପ୍ଟରର ସଦସ୍ୟଗଣ, ଶିକ୍ଷାବିତ୍, ଆଇଆଇଟି ଭୁବନେଶ୍ୱରର ଛାତ୍ରଛାତ୍ରୀ ଏବଂ ଅଧ୍ୟାପକମାନେ ଅଂଶଗ୍ରହଣ କରିଥିଲେ।